ਬੂਹੇ ਆਈ ਬੰਨੋ ਲਈ ਗੀਤ:
ਆ ਆਪਣੇ ਘਰ ਸੋਹਣੀਏ ! ਤੈਨੂੰ ਜ਼ਿੰਦਗੀ ਦਾ ਵਰ ਦਿਆਂ
ਆ ਨੀ ਬੰਨੋ ਰਾਣੀਏਂ ! ਝੋਲੀ ’ਚ ਖੁਸ਼ੀਆਂ ਭਰ ਦਿਆਂ
ਬਾਗਾਂ ਦੇ ਸਭ ਫੁੱਲ, ਤੇਰੇ ਰਾਹਾਂ ਵਿੱਚ ਵਿਛਾ ਦਿਆਂ
ਆਸਾਂ ਦੀ ਨਰੇਲ ਸੁੱਚੀ , ਪੱਲੇ ਦੇ ਵਿੱਚ ਪਾ ਦਿਆਂ
ਆ ਕਿ ਤੈਨੂੰ ਮੌਲੀਆਂ ਦਾ, ਮਹਿੰਦੀਆਂ ਦਾ ਵਰ ਦਿਆਂ
ਆ ਨੀ ਬੰਨੋ ਰਾਣੀਏਂ ! ਝੋਲੀ ’ਚ ਖੁਸ਼ੀਆਂ ਭਰ ਦਿਆਂ
ਕਾਸ਼ਨੀ ਕੋਈ ਸੰਦਲੀ , ਧੁੱਪਾਂ ਦੇ ਲੀੜੇ ਪਾ ਦਿਆਂ
ਚੰਨ ਦੇ ਕੁੜਤੀ ਤੇਰੀ ਨੂੰ ਫੇਰ ਬੀੜੇ ਲਾ ਦਿਆਂ
ਅੰਬਰਾਂ ਤੋਂ ਲਾਹ ਕੇ ਤਾਰੇ ਮਾਂਗ ਦੇ ਵਿੱਚ ਜੜ ਦਿਆਂ
ਆ ਆਪਣੇ ਘਰ ਸੋਹਣੀਏ ! ਤੈਨੂੰ ਜ਼ਿੰਦਗੀ ਦਾ ਵਰ ਦਿਆਂ
ਸੱਤੇ ਸੁਰ ਪਰੋ ਕੇ ਤੇਰੇ ਪੈਰੀਂ ਝਾਂਜਰ ਪਾ ਦਿਆਂ
ਮੱਥੇ ਉ'ਤੇ ਲਿਸ਼ਕਦੇ ਲੇਖਾਂ ਦੀ ਬਿੰਦੀ ਲਾ ਦਿਆਂ
ਤੇਰਿਆਂ ਨੈਣਾਂ ਦੇ ਅੰਦਰ , ਖਾਬ ਰੰਗਲੇ ਧਰ ਦਿਆਂ
ਆ ਨੀ ਬੰਨੋ ਰਾਣੀਏਂ ! ਝੋਲੀ ’ਚ ਖੁਸ਼ੀਆਂ ਭਰ ਦਿਆਂ
ਲਾਹ ਕੇ ਤੈਨੂੰ ਡੋਲਿਉਂ , ਦੇਹਲੀ 'ਤੇ ਤੇਲ ਡੋਲ੍ਹ ਕੇ
ਪੰਜ ਨਦੀਆਂ ਦੇ ਪਾਣੀ ਦੇ ਵਿੱਚ,ਪੰਜ ਪਤਾਸੇ ਘੋਲ ਕੇ
ਤੇਰੇ ਸਿਰ ਤੋਂ ਵਾਰ ਕੇ , ਬਲਾਵਾਂ ਦੂਰ ਕਰ ਦਿਆਂ
ਆ ਆਪਣੇ ਘਰ ਸੋਹਣੀਏ ! ਤੈਨੂੰ ਜ਼ਿੰਦਗੀ ਦਾ ਵਰ ਦਿਆਂ
ਆ ਨੀ ਬੰਨੋ ਰਾਣੀਏਂ ! ਝੋਲੀ ’ਚ ਖੁਸ਼ੀਆਂ ਭਰ ਦਿਆਂ
ਆ ਨੀ ਭਾਗਾਂ ਵਾਲੀਏ ! ਤੈਨੂੰ ਜ਼ਿੰਦਗੀ ਦਾ ਵਰ ਦਿਆਂ !
No comments:
Post a Comment